Indiamiut filmiliaat Oscarinnanniunnermi ajugaavoq
“Slumdog Millionaire” qulinik Oscarinnattussatut innersuussutigineqarpoq, arfineq-pingasunillu Oscarinnatsinneqarluni, ilaatigut filminit pitsaanerpaatut taaneqarluni aamma ilitsersuisua Danny Boyle ilitsersuisutut pitsaanerpaatut Oscarinnatsinneqarpoq.
Kate Winslet arnani pingaarnerpaatut inuttatut filmimi “The Reader”-imi pingaarnertut inuttaanermini pitsaanerpaatut Oscarinnatsinneqarpoq. Angutini pingaarnertut inuttani Sean Penn filmimi “Milk”-imi, kommunimut ilaasortap anguteqatiminoortartup Harvey Milk-ip San Francisco-meersup 1978-imi saassussinikkut pinerlineqarluni toqutaasoq pillugu filmimi pingaarnertut inuttaanermini Oscarinnappoq. Isiginnaartitsisartoq Penn, anguteqatiminoortartuunngitsoq, qujassuteqarnermini USA-mi suiaassuseqatiminnik atoqateqartartut katinnissaminnut allatulli naligiissitaanissaat piumasaraa.
Oscarinnattut allat tassaapput, Penélope Cruz arnani inuttatut pingaannginnerusutut oscarinnattoq, angutinilu inuttatut pingaannginnerusutut, isiginnaartitsisartoq toqukkut qimagutereersoq Heath Ledger Batmanimut filmiliami “The Dark Knight”-imi inuttaanerminut oscarinnappoq.