Politimesterip tullersortaa: Kalaallit Nunaanni persuttaasarnerit amerlavallaarput
Taamatullu Nunatta inissisimanera, Nunatsinni politimesterip tullersortaata, Morten Nielsenip alianartuunerarpaa, ajoraluartumillu persuttaasarnerit ikiliartunngitsut oqaatigalugu. Kalaallit Nunaannut atatillugu kisitsisit ajoraluartumik taamaammata alianaraluarpoq, uagulli uissuummissutiginngilarput. Ukiummi tamaasa suliavut pillugit nalunaarusiortarnitsinni nalunngilarput, naalagaaffeqatigiinnerup iluani Kalaallit Nunaanni kisitsisit pineqartut Danmarkimiit Savalimmiuniillu qaaffasinnerujuaannarput. Kalaallit Nunaanni, nunanilumi allani, persuttaasarnerit imigassartorsimanermik aallaveqartuartarput. Kiisalu Kalaallit Nunaanni angerlarsimaffinni persuttaasoqartarnera immikkut maluginiagassaavoq. Ukiuni kingullerni nalunaarusiatsinni kisitsisit qimerluualaarakkit takusinnaavara 2007-imi persuttaasarnerit nalunaarutigineqarsimasut 2006-imut naleqqiulugit appalaarsimagaluartut, ajoraluartumik oqartariaqarpunga persuttaasarnerit ataatsimut isigalugit amerlajuaannartut, politimesterip tullersortaa, Morten Nielsen oqarpoq.
Pinerlunnaveersaartitsineq politiit suliaannut ilaalluinnarmat, tamanna ataqatigiissaarluakkamik ingerlanneqarpoq. Sumiffinni assigiinngitsuni politeeqarfiit, ukiut tamaasa ukiumi tulliuttumi anguniagassamittut tunaartarisassatik saqqummiuttarpaat. Taamaammat assigiinngitsorpassuartigut pinerlunnaveersaartitsineq ingerlanneqarpoq. Kalaallit Nunaanni pinerlunnerit nunanut allanut sanilliullugit amerlajuaannarmata immaqa oqartoqarsinnaagaluarpoq pinerlunnaveersaartitsineq iluatsissimanngitsoq. Kisianni misissuinerit tamarmik takutippaat pinerlunnaveersaartitsineq iluaqutaajuaannartoq, taamaammat pinerlunnaveersaartitsineq pingaartillugu ingerlattuassavarput, politimesterip tullersortaa, Morten Nielsen oqarpoq.