Tamarmik imminnut ajugaasutut suaarutigipput
Qinersinerummi inernera assigiinngitsunik periarfissaliivoq. Qinersisartoq Benjamin Netanyahu-mik qinersisimasoq oqarpoq, pakatseqaluni siunissamilu qanoq ineriartortitsisoqassanersoq eqqoriaruminaatsillugu. Benjamin Netanyahu-mmi partiia, Lekud, Tzipi Livnip partiianit ilaasortamik ataatsimik qaangerneqaqqalaarpoq. Inuiaat qinigaqareerput, Kadima (Siumut), Tzipi Livni tapersersortiminut suaarpoq. Tzipi Livnilli partiia taaguunneqarluaraluartoq partiit akulliit saamerliillu ataatsimut isigalugit sanngiilleriarput. Lekud-imeersut partiillu talerperliit katillutik, inatsisartuni inissat 120-t akornanni 64-it inuttalerpaat. Netayahu aamma tapersersortiminut suaarpoq; Inuiaat qinigaqareerput, talerperliit amerlanerussuteqarput. Talerperliilli ilumut amerlanerussuteqaraluartut, Palæstinami nunani tiguakkani nunaqarfeeraliortunik tapersersuisut talerperliit ingasaassiniat aamma Netanyahu-p suleqatigisariaqalissagamigit ornigivallaanngikkaluarpaa. Tzipi Livni-llu Netanyahu-mik tapersersuisut ilaat ingasaassinianngitsut imminut tapersersuilersinniarsarai. Maannakkulli kina naalakkersuisunngortitsiniaanermi siuttuussanersoq anneruniussutigineqarallassaaq. Kikkut naalakkersuisunngussanersut, naalakkersuinikkullu qanoq siunniussaqartoqassanersoq, soorlu Palæstinamiunut atatillugu, suli nalunarallarpoq.
