Naalakkersuisup peqqissaasut tapersersorpai
Ilaqutariinnermut Peqqissutsimullu Naalakkersuisup Naja Petersenip peqqissaasut akissarsiaasa qaffanneqarnissaat tapersersorpaa.
Skrevet af Louise M. Kleemann
- Kalaallit Nunaanni peqqissaasut akissarsiaat pitsaanerusariaqarput, akissarsianillu isumaqatigiinninniarnerit aallartinneqarpata tapersersussavakkat, taamaaliornikkut ataavartumik sulisussaqalersinnaassagatta, Naja Petersen oqarpoq.
Peqqinnissaqarfimmi peqqissaasunik sulisussaaleqinerujussuup kingunerisaanik Naalakkersuisut suleqatigiisitaliaata Task Forcep ilaatigut peqqissaasut akissarsiaat misissussavaat.
Suleqatigiissitami peqqissaasut akissarsiaat kiisalu ataavartumik suliinnarnissaat qanoq anguneqarsinnaanersoq paasiniassavaat.
Peqqissaasut akissarsiaat pillugit isumaqatiginninniarnerit marsimi aallartissapput.