Qalasersuarmut ukiunik 100-nngortorsioriartussapput
Amerikamiut issittumut ilisimasassarsiortartut tusaamasat, Robert Pearyp aamma Matthew Hensonip, apriilip arfernanni 1909-mi Qalasersuarmut apuunnerannit ukiut 100-nngornerat ullormi tassani nalliuttorsiutiginiarneqarpoq.
- Qalasersuarmut 1909-mi apuunneq ullumikkut qaammammuliartarnertulli persuarsiutigineqartigaaq, ukiunik 100-nngortorsiornissamut aaqqissueqataasut ilaat, ilisimatuussutsikkut peqatigiiffimmit Harvard Foundationimeersoq, Allen Counter, oqarpoq.
Pearyp aamma Hensonip ilaqutaat naggueqatigiinnit Inunneersut sinniisuisa nalliuttorsiornerni ilaanissaat eqqarsaataavoq. Aamma isiginnaartitsisartoq Sharon Stone takkunniarporooq, soorluttaaq Polar Explorers angalasussanut 26-nut qulimiguulimmik Qalasersualiartitsiniartoq. Angalanermi tassani peqataasut ulluni pingasuni angalanerminni 150.000 koruunit sinnerlugit akiliissapput.