Kinami timmissat nappaalaqqilerunarput
Timmissat nappaataat atuuteqqilerunartoq, aviisimi Politikenimi allaaserineqarpoq.
Skrevet af Lotte Holm
Timmissat toqungasut arlallit Hong Kongimi nunamut tipisimapput, timmissallu nappaataata atuutileqqissimanissaa paasisimannilluartunit ernummatigineqalerpoq.
Timmissat toqungasut tippussaasut taakku timmissanik misissuiffiit maanna misissulerpaat, timmissallu pingasut virusimik, inunnit toqqutigineqarsinnaasumik, H5N1-imik, tunillatsissimasut maannamut nassaarineqareerput.
Inuit arfineq-pingasut timmissat nappaataannik tunillatsissimallutik toqusimasut Kinami oqartussaasut januaarimi nalunaarput. Nappaatinilli tunillannartunik paasisimannilluartoq, Lo Wing-Lok, oqarpoq, tunillaassuineq oqartussaasut oqarneranniit immaqa annertunerusoq.