17-inik ukiulimmik eqqartuussineq aallartinneqarpoq
17-inik ukullip illersuisua Nicholas Symes isumaqarpoq, suliassap kinguartiterneqarsimanera pissutigalugu, 17-inik ukiulik sakkukinnerusumik pineqaatissinneqartariaqartoq. Danmarkimi aviisi Nordjyske ullaaq manna taama allaaserisaqarpoq.
Siusinnerusukkut Radioaviisimi oqaluttuarereerparput, angut inuusuttoq qaammatini 17-ini tigummigallakkatut parnaarusimaneqareersoq. Aamma Nicholas Symesip oqaatigaa, suliassaq kinguarsarneqarsimappat, pineqaatissiisarnermut inatsit sakkukinnerusumik pineqaatissiinissamut periarfissiisoq.
Taamaattumik eqqartuussissuserisup neriuutigaa, ukiut pingajuata affaanik parnaarussassanngortitsisoqassasoq, tamannalu inuusuttunut pinerluuteqarsimasunut inissiisarfimmi pissasoq.
Akerlianik unnerluussisut ukiuni arfineq pingasuni parnaarussaanissaa piumasariniarpaat.
Ullumi kingusinnerusukkut eqqartuussinermi aalajangiisoqassaaq. Aalborgimilu eqqartuussineq suleqatitta malinnaaffigaa, ulloqeqqanilu Radioaviisimi tusarliussinissarput naatsorsuutigaarput.