Finn Karlsen: Inuit ilanngunnagit inerteqquteqarnissaq orniginarneruvoq

Tunisassianik puisineersunik nunanut EU-mut ilaasortaasunut eqqussueqqusinnginnissamik EU-Kommissionip siunnersuutaa oqaaseqarfigeqqullugu Finn Karlsen qaaqqusaavoq. Kommissionilli siunnersuutaani Issittumi Inuit ilanngunneqanngillat, puisinniartarnerlu akuerisaasoq atorneqartarpat taakkunannga tunisassiortoqarsinnaavoq.

Naalakkersuisoq oqaluttarfimmiit ima nassuiaavoq:

- Massakkut iluatsitsinnginnermut atatillugu tamanna pitsaanngitsumik misilittagaqarfigereerparput, pisisartummi allaat ilaanni takusinnaaneq ajorpaat kalaallit tunisassiortulluunniit amiutigineraat.

Inerteqquteqarnissalli pitsaaquteqarnera Naalakkersuisup oqalugiarnermini aamma erseqqissaatigaa.

- Inuit ilaatinnagit inerteqquteqarnissaq Kalaallit Nunaannut suli ajunngimmat allanik pitsaanerusunik ilaatitaannginnissamut periarfissaqannginnerput tamatumunnga pissuterpiaavoq. Amerlanerussuteqartut inerteqquteqarnissamut eqiterupput, Finn Karlsen oqarpoq, ilanngullugulu eqqaavaa, Kalaallit Nunaat piniartullu inuuniarnikkut atugaat pillugit EU ilisimasaqanngippallaartoq.

EU-p naqittagaani, The Parliamentimi, januaarip ulluisa 20-anni saqqummersumi, puisinniarnerup Kalaallit Nunaannut pingaarutaa pillugu Finn Karlsen ilanngutaqarpoq, tamatumalu saniatigut naqitigaq paasissutissaq nutartertissimallugu. Paasissutissaq soqutigineqartorujussuusoq Aalisarnermut, Piniarnermut Nunalerinermullu Naalakkersuisoq, Finn Karlsen, ilisimatitsivoq.