Island: Björgvin Sigurdsson ministeritut tunuarpoq
Tamanna pivoq Islandimi inatsisartut ataatsimiittarfiata silataani akerliussutsimik takutitsisut 6.000-it ippassaq nipilioqalutik naalakkersuisut aningaasarsiornikkut ajornartorsiornermut iliuusaat naammaginagit, tunuarnissaat piumasaqaatigereeraallu.
- Qinersisartut kamannerat tatiginnikkunnaarnerallu sakkortoqimmat, uannut tatiginnilerseqqinniarnissaat ajornakusuussangatikkakku tunuarpunga, Sigurdsson oqarpoq, naalakkersuisunullu akerliussutsimik takutitseqattaarnerit ukiarmili pilersimanerat innersuussutigalugu.
Ministeri tunuarpoq, ministeriunerup talerpilliunianeersup Geir Haardep nalinginnaasumik qinersinissaq ukiunik marlunnik sioqqullugu, maajip qulingiluaani qinersisoqartussanngorneranik nalunaaruteqarneranit ullut marluk qaangiuttullu.
Ministeriunerup Haardep Islandimi aningaaseriviit qulakkiigaanngitsunik atukkiisarnermikkut, Islandip nunarsuarmi aningaasarsiornikkut ajornartorsiornermi eqqugaanerpaaneranut pisuunerarlugit ippassaq saassuppai.
Geir Haardep naalakkersuisui Europami siullerpaallutik, aningaasarsiornikkut ajornartorsiorneq pissutigalugu qinersisitsisariaqalerput.