Kangaatsiap eqqaani tunitsiviit pingasut matussapput

Pisortaq Pâviâraq Heilmann akilersinnaajunnaartut pillugit ima nassuiaavoq.

- Paasivarput teknikkikkut tunisassiorfiit inissisimanerat naatsorsuutigisamit ajornerujussuusut, taamaattumik ingerlanniarneri aserfallatsaaliniarnerilu aningaasartuuteqarnarnerujussuusut, Pâviâraq Heilmann nassuiaalluni aallartippoq.

Ingerlatsinermut aningaasartuutit saniatigut ilimagisamit saarulleqannginnerusimavoq, aalajaatsumillu tunioraasussaaleqisoqarsimalluni.

- Aamma saarulliit akii assut appariarsimapput. Tamakkuupput Royal Greenlandip matusinissamik aalajangerneranut tunngaviusut. Piginnittunut Namminersornerullutik Oqartussanut nalunaarutigineqareerpoq, pisortaq nangippoq.

Naatsorsuutini 2007-2008-mi amigartoorutaasut 78 millionit ilaat 20 millioni koruunit nunaqarfinni tunitsivinnit aallaaveqarput.

Tunitsiviit ammatiinnarneqassappata minnerpaamik amigartoorutit 20 millioni koruunit matussusernissaat pisariaqartinneqassapput.

Namminersornerullutik Oqartussanit taperneqarnissaq anguniaannarnerpaat? Pisortaq aperaarput.

- Naamik, naluneqanngitsutut Royal Greenland ingerlatsivittut imminut akilersinnaasutut ingerlanneqartussaavoq, tamannalu sulinitsinnut tunngaviuvoq, nassuiaavoq.

Namminersornerullutik Oqartussat Royal Greenlandip akissummini aaqqiissuteqartoqartariaqartoq.

- Matusinermi ilaannakortumilluunniit ammatitsissagaanni allamik aaqqiissuteqartoqartariaqartoq oqaatigaat. Imaassinnaavoq tunisassiorfiit allanut tunissasut allatulluunniit aaqqiisoqartoq. Periarfissanik ujartuisoqassaaq, taannalu utaqqimaarparput, Pâviâraq Heilmann oqarpoq.

Sulisut soraartussat 20-t pikkorissarnissamik neqeroorfigineqassapput Qasigiannguaniluunniit sulilernissaanik aperineqassallutik.