TASIORTA: Meeqqanik kajungerinnittartut katsorsarneqartariaqarput
Inuit meeqqanik inuusuttuaqqanillu atoqateqarusuttartut katsorsarneqarnissaminnik pisortaniit ullumikkut ajoraluartumik neqeroorfiginissaqanngillat. Inersimasut meeqqanut inuusuttuaqqanullu atoqatigiinnikkut kannguttaalliortartut tapersersunngikkaluaqigivut, taamaattoq asissuinikkut malersuinikkulluunniit pinaveersaartitsinatalu ikiuinianngilluinnarpugut.
Meeqqat inuusuttuaqqallu illersorniarutsigik inersimasut meeqqanik inuusuttuaqqanillu atoqateqarusuttartut suliamik ilisimasalinnik siunnersortissaqartittariaqarpavut.
- Meeqqat inuusuttuaqqallu kannguttaalliorfigineqarnissaannut ullumikkornit anneroqisumik illersorsinnaagaluarpavut. Inersimasut meeqqanik inuusuttuaqqanillu atoqatigiinnikkut soqutiginnittut nunani allanisulli pitsaatigisunik katsorsarneqarnissaannik neqeroorfigisariaqarpavut, TASIORTA-mi siulittaasoq, Arnaq Grønvold, oqarpoq, nangillunilu:
- Taamaaliorluta meeqqanik inuusuttuaqqanillu atoqateqarusuttartut inuunermik nikanarsagaaffiunngitsumik tunisinnaavavut, minnerunngitsumillu: Meeqqat inuusuttuaqqallu ullumikkornit pitsaanerujussuarmik illersorsinnaassallutigik, Arnaq Grønvold naggasiivoq.