Israelimiut Gazamit tunuartilerput
Hamasikkut Israelimiut aamma piumaffigaat sakkutuutik Gazamit sapaatip-akunnera ataaseq qaangiutsinnagu aniseriissagaat.
Egyptenimiut præsidentiat Hosni Mubarak, isumaqatigiissitsiniarnermi siuttoralugu sakkuaakkunnaarnissaq isumaqatigiissutigaat.
- Soorunami sakkuaakkunnaarnerput pingaartuuvoq pisariaqarlunilu, naammanngilarli, Palæstinamiut præsidentiat Abbas oqarpoq, nangillunilu.
- Israelimiut tamavimmik Gazamit anissapput, killeqarfiillu assersukkatik ammaqqillugit. Ikiuiniaqatigiiffiit maannamut isitsaaliorneqarsimasut ikiuutinik nassarlutik Gazamut isaasariaqalerput, Abbas erseqqissaavoq.
Gazami ulluni 22-ini qaartartumeerisaqattaarnerni ajunaartut amerlaqaat. ulluni kingullerniinnaq inuit ikinnerpaamik 95-it timaat nassaarineqarput, taamaalillutik inuit katillutik 1.300-t toqutaapput, kisitsimmut ilaallutik meeqqat 400-t sakkutuujunngitsorpassuillu allat. Inuit allat 5.300-t ikilerneqarsimasut aamma nutaarsiassaqartitsiviit nalunaarutigaat.
Egyptenip siuttuuffigisaannik nunat siuarsimasut siuttui - Naalaagaaffiit Peqatigiit FN-ip generalsekretæria Ban Ki-moon peqataasoralugu – Gazami eqqisseqatigiinnerup qanoq attatiinnarneqarnissaa sulissutigineqassanersoq ullumimiit ataatsimiissutigilerpaat.
