Ilisimatuut paasisaminnik oqaluttuassapput
Ilisimatuussutsikkut misissuisoq Birger Poppel ima qulequtsiilluni saqqummiussisussaq: “Kalaallit Nunaanni qanoq naammagisimaarinnitsigaagut?” oqarpoq, taamatut aaqqissuussinikkut ilisimatusarnikkut paasisanik paasiuminaatsunik paasiuminarnerusunngortitsilluni inunnut amerlanerusunut saqqummiussiniarnerusoq.
- Tamatumuuna innuttaasunut paasiuminartumik soqutiginartumillu qarasaasiakkut seqersittakkat aamma apeqqutit akissutillu atorlugit ilisimatusarnikkut paasisat nassuiarniarniarneqarput, Birger Poppel oqarpoq.
Aaqqissuussineq ulluni marlunni ingerlanneqassaaq arfininngorpat qulequtarineqassapput “Kalaallit Nunaata imartaa – sammissallugu soqutigineqaqisoq”, “Silap pissusaa, immap naqqanit isigalugu” kiisalu tusarneqarsinnaavoq “Mallit qaartarpalunnerisa Kalaallit Nunaata oqaluttuarisaaneranik oqaluttuarnerat”.
Sapaatiuppat inuiaqatigiit, peqqissuseq aamma kulturi sammineqassapput, ilaatigut tusarneqarsinnaallutik “Hvalros Ø Silarsuup Qitiatut isigineqarallarmat” aamma “Kalaallit Nunaanni nunanilu issittuni nappaatit tunillaassuuttut”.
Ilisimatusartut saqqummiussineri Nuummiunut arfininngorpat sapaatiuppallu Ilimmarfimmi ualikkut marluniit tallimat tungaannut ingerlanneqassapput. Katuamiillu akeqanngitsumik busserluni Ilimmarfiliartoqarsinnaassaaq.