Norgemi ataatsimiinneq nunatsinnit peqataaffigineqassaaq
Nunat Tamalaat Akornanni Issittumi Ukioritinneqartunut atatillugu ataatsimiinneq Norgemi sapaatip akunnerata tulliani ingerlanneqartussami Kalaallit Nunaat peqataatitaqassaaq.
Skrevet af Louise M. Kleemann
Aningaasanut Nunanulllu Allanut Naalakkersuisoq Per Berthelsen ataatsimiinnermi peqataassaaq.
Issittumut attuumassuteqartut eqqartorneqassapput, ilaatigut issittumi aatsitassarsiorneq, silap pissusaata allanngoriartornera, imaq pillugu isumaqatigiissutinut tunngasut kiisalu issittup ukiorititaani ilisimatusaatitut suliat ataatsimiinnermi oqaluuserineqassallutik.
Nunanut allannut naalakkersuisup Per Berthelsen-ip ammaanersiornermi oqalugiaatigissavaa tuluttut taaguteqartoq ”Living of nature” – pinngortitamik inuussuteqarneq, piujuaannartitsinikkut pinngortitap pisuussutaanik uumassusilinnik atuisinnaanermik pisinnaatitaaffik.