Sulisartut nuttarsinnaassusiat misissorneqalerpoq
Ukiuni kingullerni qulini inuuttaasut nuttartarnerini paasissutissat pioreersut tunngavigalugit misissuinissaq ingerlanneqassaaq saniatigullu inuit 1.600-it missaaniittut suliffiit pillugit nuukkusussinnaassusiat qanoq innersoq paasiniarneqassalluni. Taassuma saniatigut aamma kalaallit Danmarkimiittut Nunatsinnut qanoq suliartorusutsigisinnaanerat misissorneqassaaq.
Aatsitassarsiornerup, takornariaqarnerup suliffissuaqarnerullu ukiuni tulliuttuni ineriartortinneqarneri ilutigalugit inuit suliffigisinnaasatik aalajangiisuutillugit nuuttariaqartalertussaassammata paasiniaaneq aallartinneqarpoq. Nunatsinni suliffeqarfiit ineriartortinneqartussat sapinngisamik kalaallinik sulisoqarnissaat anguniarusullugu paasiniaaneq Namminersornerullutik Oqartussat aallartippaat.
Suleqatigiiffik aluminiuliorfiliornissap avatangiisinut sunniutissaanik misissuititat ilaannik kiisalu Inuussutissarsiornermut Suliffeqarnermullu Naalakkersuisoqarfimmeersunik inuttalerneqassaaq, Nunatsinnilu naatsorsueqqissaartarfimmiit aqunneqassalluni.
