Siumumi ilaasortat: Ruth Heilmann inuiaqatigiinnut utoqqatsertariaqarpoq
Utoqqatsernissaq inatsisartuni ilaasortat ilaasortanik allanik unioqqutitsillutik taasissussisarsimanerannut tunngassuteqarpoq. Ruth Heilmannip taasissussisarsimasunut kinguneqartitsinnginnissamik decembarip ulluisa 19-anni oqaatsini ukiortaami pilluaqqussummini erseqqissaatigeqqippaa.
Tamannali Siumukkormioqataasa naammaginngilaat.
- Paasiuminaappoq sooq uparuartuisut inatsisaatsuliornermut illersuisutut imminnut inississasumik oqarnersoq. Inatsisartummi siulittaasuata inuiaqatigiit sullissisui, inatsisartut, siulittaasuuffigai, imminullu sullittussaanani, Siumut inatsisartuni gruppeani siulittaasoq tullialu oqarput.
- Siulittaasup inuiaqatigiit sullitassarai, taamaammat inatsisartut inatsisiliaasa atuutsinneqarnerannik unioqqutitsisut namminerpiaq illersugassarinngilai inuiaqatigiillu inatsisaatsuliortutut nittagassarinagit. Siulittaasoqarfik politiitut eqqartuussisutullu sulisussaanngilaq pinngitsuutitsisinnaananilu. Taasissussisarsimaneq inatsisinik unioqqutitsinerummat politiinut suliakkiissutigisariaqarpoq, erseqqissaapput.
- Ataatigut atsiortugut inatsisartut siulittaasuata inuiaqatigiit uagullu inatsisartuni ilaasortaasugut inatsisaatsuliortutut suaarutigimmatigut kusanaannerpaatut taarusupparput, kikkut tamat oqartussaaqataanerannik innarliineruvoq akuerineqarsinnaanngitsoq. Pisumut sakkortunerpaamik akerliugatta inatsisartut siulittaasuat piumaffigaarput inuiaqatigiinnut tamanut piaarnerpaamik utoqqatsissasoq, Otto Jeremiassen Isak Davidsenilu naggasiipput.