Inuusuttut inatsisartuisa ataatsimiinnissaannut ikippallaartut nalunaarput
Pilersaarutaagaluarpoq Inuusuttut inatsisartui januaarip ulluisa 17-annit 22-ata tungaanut Nuummi ataatsimiinnissaat.
Inatsisartut Siulittaasoqarfiata nalunaarutigaa,
Inuusuttut inatsisartuisa ataatsimiinnissannut amerlanerpaamik 31-it peqataasussaasut, taamaattorli 15-it kisimik ilinniartoqarfinnit nalunaarutigineqarsimammata, taamatullu oqaluuserisassatut siunnersuutaasut piffissarititaasup naanerani, nassiunneqarsimasut ikippallaarnerat pissutigalugu Inuusuttut inatsisartuisa ataatsimiinnissaat kinguartinneqartoq.
Inatsisartut siulittaasoqarfiat tusagassiuutinut nalunaaruteqarluni allappoq, Inatsisartut allattoqarfiat ilinniartoqarfinnut arlaleriarluni allakkatigut oqarasuaatikkullu attavigineqartuarsimagaluartut oqaluuserineqartussat peqataasussallu pillugit.
Inatsisartut Siulittaasoqarfiannit nalunaarutigineqarpoq, 2009-mi Inuusuttut Inatsisartuisa ataatsimiinnissaat piffissami qaninnermi nalunaarutigineqarumaartoq.
