Aaja Chemnitz: Nunarput iluarisimaarinnissinnaavoq
Tapiliussat: Aaja Chemnitzip oqarneratuut ilumut taama amerlatigisunik aningaasaliisoqartigissanersoq, KNR-ip uppernarsisinnaasimanngilaa. Allaaserisami tamanna erseqqissarneqarpoq. Naalagaaffiullu nunatsinni meeqqanik inuusuttunillu ikiorsiinermut 2020-miit 2023 ilanngullugu atugassatut 80 millionit koruuninik 2019-imi aningaasaliineranut tunngasumik aamma tapiliussaqarpugut.
Socialdemokrater, Venstre aammalu Moderaterne Danmarkimi naalakkersuisoqatigiilernerat tusagassiortunik katersortitsinermi ippassaq nalunaarutigineqarpoq. Taakkulu naalakkersuisoqatigiilernerat nunatsinniit folketingimut qinikkat marluk tamarmik iluarisimaarpaat.
- Naalakkersuisoqatigiilersut politikkikkut tunaartassaat iluarisimaarpakka, nunarputtaaq iluarisimaarinnikutsoorsinnaavoq, Aaja Chemnitz oqarpoq.
Atlantikup avannaamiunut aningaasaliissutit qaffannissaat KNR-ip suli uppernarsisinnaasimanngilaa.
Kalaallit Nunaat pineqarpat Kalaallit Nunaat peqataasassaaq
Aaja Chemnitzip nunarput pillugu aalajangiisoqartillugu nunarput peqataatinneqartassasoq qineqqusaarutigaa, tamannalumi iluatsippoq.
Danskimmi naalakkersuisoqatigiivisa tunaartassaanni allassimavoq, Kalaallit Nunaat pineqartillugu Kalaallit Nunaat peqataatinneqartassasoq.
- Illersornissamut isumaqatigiissutissaq aammalu aningaasaqarnermut inatsisissiornermi isumaqatigiinniarnernut peqataasalissaagut, massakkullumi aamma taamaappugut, tamannalu ajunngilluinnarpoq, Aaja Chemnitz oqarpoq.
Siunissamullu kalaallit qilanaaginnarsinnaapput, Aaja Chemnitzimi naapertorlugu danskit naalagaaffiat nunatsinnut aningaasaliissutit saniatigut aningaasaliissutinik allanik aamma aningaasaliisoqarniarpoq.
- Siunissami 30 millioninik aningaasaliisoqassaaq. Kalaallit Nunaannut Savalimmiunullu ukiumut aningaasaliissutit 20 millioni koruuniusaraluarput, tamanna periarfissanik arlalinnik ammaassaaq, suliutinummi assigiinngitsunut atugassanik 10 millioner koruuninik aningaasat ilaneqassapput, Aaja oqarpoq.
Meeqqat inuusuttullu sumiginnakkat nunatsinniittut aamma isiginiarneqarput
30 millionillu taakku saniatigut aamma 50 millioninik meeqqat inuusuttullu suliniuteqarfigineqarnerinut atugassanik aningaasaliisoqartassaaq.
- IA-miit salliutikkusutarput meeqqat inuusuttullu sumiginnarneqarsimasut ikiorserneqarnissaat maanna qulakkeerpoq, tassungalu tunngasoq aamma danskinit saarlerpaatinneqarpoq. Tassalu 50 millioner koruuninik taakkununnga atugassanik aningaasaliisoqartalissaaq, Aaja Chemnitz oqarpoq.
Folketingi nunatsinni meeqqanik inuusuttunillu ikiorsiinermut 2020-miit 2023 ilanngullugu atugassatut 80 millionit koruuninik 2019-imi aningaasaliivoq.
Aningaasaliissutit suli 50 millionit koruuniuinnassanersut KNR-ip amma suli uppernarsisinnaasimanngilaa.
