Lene E. Afghanistanimut apuutinngitsoorpoq
Taama pisoqarpoq nunap eqqissiviilliorfioqisup taassuma illoqarfiisa pingaarnersaanut timmisartumik minnialeruttortut eqqaassisoqalermat.
Lene Espersenip timmisartuani aquttut Kabul-imut missinnaanngitsut paasitinneqarput, allamullu miffissarsiupallakkamik Kasakstanimut millutik. Tassanngaanniit Lene Espersen Danmarkimut utiinnartariaqarpoq, ataatsimeersuarnermilu peqataanngitsoorluni.
Ataatsimeersuarneq sioqqullugu Lene Espersenip USA-p nunanut allanut ministerianik Hillary Clintonimik Afghanistanimilu arnanut suliniaqatigiiffinneersunik ataatsimeeqateqarnissani qilanaarisimagaluarpaa. Ataatsimiinnissarli taanna ullumi taamaatiinnarneqarpoq.
Ataatsimeersuarnermi nunanut allanut ministerit nunanit assigiinngitsunit 41-neersut peqataasussaagaluarput.
Peqataasussalli allat anngunniarnertik aamma ajornartorsiutigaat. Kabulip mittarfianut qaartartunik igeriuttakkanik saassussineq pissutigalugu, Naalagaaffiit Peqatigiit pisortaat Ban Ki-moon aamma Sverigimi nunanut allanut ministeri Carl Bildt aamma Kabulimut missinnaasimanngillat.
Ataatsimeersuarnermi Afghanistanimi naalakkersuisut nunallu allat peqataatitaqartut, Afghanistanimi eqqisseqatigiinnissaq ineriartortitsinissarlu nutaamik pilersaarusiortussaavaat.