Tikaagulliusaaq Vejlep Kangerluani pingasunngormalli ingerlariaqqissinnaajunnaaqqagaluartoq, ullumi toqusimasoq uumasut nakorsaannit nalunaarutigineqarsimavoq. Aviisip Jyllandspostenip nittartagaani tamanna allaaserineqarpoq.
Uumasut nakorsaat, Århusimi DTU-mi uumasut nakorsaasa Institutianeersoq, Trine Hammer Jensen, oqarpoq, tikaagulliusaap tassanngaannaq toqunera nassuiaatissartaqanngitsoq, nukillaaqqasimaqaarli kangerlummullu pulagami napparsimasimagunarlunilu.
Tikaagulliusaaq Københavnimi Katersugaasivissuarmi, Zoologisk Museumimukaanneqassagunarpoq, tassani neqaajarneqassalluni.
Vejlemi qatserisartut neriuutigaat unnugu nalunaaqutaq arfineq-pingasut qulingiluallu akornanni ulippat tikaagulliusaaq qaqissinnaassallugu.
- Kalittaat atorlugu nunamukaanniarsarissavarput, kisianni oqimaatsorujussuuvoq, 30 tonsinimmi oqimaassuseqaannanngilaq, aamma imermik ulikkaarpoq, tikaagulliusaap qaqinneqarnissaanut suliniuteqartut pisortaat, Jan Lehmann, aviisimut Jyllandspostenimut oqarpoq.