Mandela Sydafrikami persuarsiortuni peqataasinnaagunanngilaq
Arsaalluni nunarsuatsinni pissartanngorniunnissamut atatillugu nipilersorluni tusarnaartitsinersuaq ernutaqqiutaata ippassaq unnukkut peqataaffigaa. Angerlartillugit biilinik ingerlatsisuat ajutoorpoq. Politiillu oqaatigaat taanna aalakoorsimasoq.
91-inik ukiulik Mandela ernutaqqiutimi ajunaarneranik ullaaq nalunaarfigineqarpoq.
- Taamaattumik ammaanersiornermi peqataanissaa tulluartutut isigineqanngilaq, Nelson Mandela Foundationimit tusagassiuutinut taama nalunaartoqarpoq.
Zenani, Mandelap ernutaqqiutaasa qulingiluaasut ilagigaluarpaat.
Arsaalluni nunarsuarmi pissartanngorniunneq Sydafrikami ullumikkut aallartissaaq, ullunilu kingullerni ateq ataaseq oqallisigineqaqaaq - tassaasoq Nelson Mandela.
Mandela præsidentitut tunuareersoq, arsaalluni nunarsuarmi pissartanngorniunnissamut piareersarnerit pimoorullugit ingerlanneqalerput, taamaattorli arsaalluni nunarsuarmi pissartanngorniunnissaq, taassumannga kingornussanit sunnersimaneqarpoq.
- Tassami Mandelap qasusuilluni saammaateqatigiinnikkut innuttaasut tamarmik peqataaffigisaannik naalagaaffimmik pilersitsinermik angusaqarnera pissutigalugu, nunarsuarmiut Sydafrika arsaalluni nunarsuarmi pissartanngorniuffiussasoq aalajangiuppaat, Sydafrikap præsidentia Jacob Zuma sapaatiummat ilaatigut taama oqarpoq.
Allaammi FIFA-p siulittaasuata Sepp Blatterip Mandela taavaa "inuk, arsaalluni nunarsuarmi pissartanngorniunnermik Sydafrikamut eqqussisoq". Ritzauimi taama allaaserinnittoqarpoq.
Ammaanersiorneq KNR-TV-kkut ullaap tungaani quliniit aallakaatinneqalerpat, nammineerlusi Mandela takusinnaassavarsi.