Sisimiut avataanni umiatsiaararsortoq ipilluni ajunaartoq

Sisimiut avataani umiatsiaararsortoq ipilluni ajunaartoq
Sisimiut aalisartut umiatsiaararsortut pingasut umiatsiaaraq usilersorpallaarsimagunarpaat, umiatsiaararmi kinnguvoq.

Inuk ataaseq ipilluni ajunaarpoq.

Aalisartut pingasut Sisimiut avataanni aalisariarsimapput. umiatsiaararlu usilersorpallaarunarmassuk umiatsiaaraq kivivoq.

Kalaallit Nunaanni Politiit pigaartuisa pisortaat Mads Lynge taama oqarpoq.

- Qujanartumik sineriammut qanittumiissimapput, inuillu marluk nunamut qaqisinnaasimapput, pingajualli ajoraluartumik annassinnaasimanngilaq ipillunilu.

Nunamut pisut marluk aappaata inuk immamiittoq nunamut qaqissinnaasimavaa, uummarsaaniaraluarnerli iluatsinnani.

Politiit inunnik killisiuipput, alianartumillu ajutoortoqarneranik nalilerlugu.

Sivikitsumilluunniit angalaniaruit puttaquteqarit

Kikkulluunniit immakkut angalaniartut puttaquteqartarnissamik kaammattorneqarput:

- Mianersornissaq pingaaruteqarpoq, umiatsiallu usisinnaassusia ilisimallugu. Puttaquteqarnissarlu pingaaruteqarpoq, soorlu aamma VHF-radioqarnissaq, periarfissaappallu ajornartoornermi kalerriummik peqarnissaq, Kalaallit Nunaanni politiineersoq oqarpoq, nangilllunilu:

- Immakkut angallannermi isumannaallisaaniarnerit taakkuupput, sivikitsuinnarmilluunniit angalaarniaraanni upalungaarsimanissaq pingaaruteqarpoq. Qaqugukkulluunniit ajutoortoqariaannaavoq, politiit oqarput.

Sisimiut avataanni ajutoortoqarnerata saniatigut illoqarfinni assigiinngitsuni najukkami eqqissiiviilliornerit aalakoortullu orniguffigineqartariaqarsimapput, Nuummilu imigassartorsimalluni biilinik ingerlatsisoq ataaseq tigusarineqarluni.

Inuit sisamat, Nuummi pingasut, Qaqortumilu ataaseq, imigassartorsimallutik biilinik ingelatsisut ippassaani tallimanngornermi tigusarineqarput.