Sakkutuunik toqutsineq akissarsiaqaatigilluartarpaat
Tuluit aviisiata The Times-ip ippassaq paasivaa talibanit sakkutuui sakkutuumik ataatsimik toqutaminnut pakistanimiut rupees-ii 200.000-it akissarsiarisaraat, taakkualu qallunaat aningaasanngorlugit 14.000 koruuniupput.
Soorunalimi - ajoraluartumillu - talibanit sorsuttartuinut neqeroorut pilerinartuulluni:
- Taakkua uatsinnut aningaasarparujussuupput. Nunamit allamiunik toqutsinerluta soqutigineq ajorparput, taakkua aavat ilaquttatsinnik pilersuilersitsisinnaammat, amerlanerillu toqukkutsigik taava sanngiinnerulersissavavut. Soorunami tamanna nalliussineqartassaaq, talibanit siuttuat The Timesimut oqarpoq.
2010-mi NATO-mi sakkutuunik toqoraaneq talibanit sorsuttartuinut 3 millionit koruunit missaannik iluanaarutaasimavoq, sakkutuut 213-it toqutaammata.
Kikkulliukua niuernermut taamaattumut tunuliaqutaasut? The Timesimi allassimasut naapertorlugit Pakistanimi Golfimilu naalagaaffinni aningaasanik tunissuteqartartut tassaapput akiliuteqartartut - taamatullu aningaasat ilaat opiumimik naatitsisarnermeersuusarlutillu sioorasaaraluni akilisitsiniartarnermeersuullutik.
