Inuusuttut paaqqutarineqaqqinnissamik neqeroorfigineqartalissapput
Inuusuttut tamakku paaqqutarineqartarnissaat ullumikkut piumasaqaataareerpoq. Inatsilli ersernerluppallaartoq, Olga P. Berthelsen (IA) isumaqarpoq.
- Tamassuma iliuuseqarfiginissaa Naalakkersuisut pisussaaffigaat. Assersuutigalugu ullukkut unnuakkullu paaqqinnittarfimmiissimagaanni meerarsiaasimagaanniluunniit namminiilernissaq artornarsinnaasarpoq. Sumi najugaqassaanga? Sumik ilinniagaqassaanga? Apeqqutit annertuut taamaattut inuusuttut 18-iliigaangamik kisimiillutik atorsinnaasarpaat, Olga P. Berthelsen oqarpoq.
Inuusuttut taama atugaqarsimasut 21-nik ukioqalernissamik tungaanut paaqqutarineqaqqinnissamik neqeroorfigineqartarnissaasa inatsisitigut qulakkeerneqartariaqarnera, Inatsisartut upernaakkut ataatsimiinneranni ullormi kingullermi amerlanerussuteqartut ippassaq akuersissutigaat.
Neqeroorutit taakku qanormita inerneqassappat?
- Paaqqutarinninnissamik sivitsuinissaq meeqqat inuusuttullu pillugit peqqussummi periarfissaavoq, kisianni pilersaarusiami ilanngutiinnarneqartarpoq erseqqissumillu siunertaqarneq ajorluni, Olga P. Berthelsen oqarpoq.
- Assersuutigalugu meeqqap ineqarniarnissaa, ilinniarnissaa, aningaasanik aqutsinissaa angajoqqaaminullu attaveqarniarnermini pitsaasumik alloriarnissaa, paaqqutarineqarnerani piumasarineqartassasoq, Olga P. Berthelsen oqarpoq.
Meeqqat 18-ileereersimagaangata angajoqqaarsiaasimasut nakkutiginneqqinnissaminnut inatsisitigut pisussaaffeqanngillat, attaveqarfigineqarsinnaasarpulli. Angajoqqaarsiarpassuilli namminneq piumassutsiminnik tapersersuisarput.