Irakimi qaartartumeerinerni toqutaasorpassuit
Irakimi illoqarfiit pingaarnersaanni Bagdadimi eqqaanilu aaqqissuussamik ullaarmanna arlaleriarluni saassussisoqaqattaarmat, ikinnerpaamik inuit 30-t toqutaapput, hunnorujullu missaanniittut ikiligaallutik.
Skrevet af Elisa Isaksen
Bagdadimit 40 kilometerinik kujasinnerusumi illoqarfimmi al-Suwayrahmi niuffaffimmi imminnut pilliutigalutik qaartartumeerisut marluk qaartitsimmata 13-it toqutaapput.
Saassussisaqattaarnerni ilaatigut sakkunik nipaallisakkanik atuiffiusumi, sakkutuut politiillu arlallit aamma toqutaapput.
Aamma illoqarfimmi Falluja-mi Bagdadip kitaaniittumi qaartartut marluk qaartinneqarmata ikinnerpaamik inuit sisamat toqutaapput.
Irakimi qanittukkut inatsisartunut qinersisoqarmat ersarissumik amerlanerussuteqartoqannginnera pissutigalugu, upperisarsiortut ingasattajaarniat peqqarniisaarniarlutik saassussisarneri amerleriarput.