Tuluit Nunaanni qinersinissaq pissanngatigineqaqaaq
Qinersisartunik isumasiuinermi Konservativit siuartuugaluarpummi, taamaattorli kisimiillutik amerlanerussuteqalersinnaanerat nalorninarluni. Tamanna Labourip siulittaasuanut Gordon Brownimut aamma LiberalDemokratit siulittaasuannut Nick Cleggimut neriuuteqalersitsivoq.
Taamaattumik Konservativit siulittaasuata David Cameronip ajugaanissaminik qularuteqanngippaallaarnissani mianersuutigaa.
Taanna qineqqusaarneq naggataarlugu nalunaaquttap akunnerini 30-ni qineqqusaarluni angalaniarpoq, unnuarulu sininnissani taamaatiinnarsimallugu, matumani qinersisartut Labourip naalakkersuisuutitaqarneranik taamaatitserusukkunik Konservativinik qinersinnissaannik qularunnaarsinniarpai.
Tamatuma akerlianik Gordon Brown oqarpoq, Konservativit naalakkersuisuutitaqalernissaat pinngitsoorniaraanni qinersisartut namminerminik qinersisariaqartut.
Partiit taakku marluullutik qinersisartorpassuit qiterlerneersunik Liberaldemokraatinik qinersinissaat ernummatigaat - taakkumi qinigaalluarnermikkut kikkut naalakkersuisunngortitsinissaannik aalajangiisunngorsinnaammata.
Labourip siulittaasua Gordon Brown, qineqqusaarnermi iluatsitsivallaanngeriarluni, qineqqusaarnermi piffissami kingullermi siuariartulaalerpoq. Ulluni kingullerni oqalugiarluartarnermigut taassuma nuannarineqarnera qaffakkiartoqqilersoq oqaatigineqarpoq.
Qinersinermi tupaallaatigineqarnerpaat - Liberaldemokraatit - taakkualu siulittaasuat Nick Clegg EU-mi suleqatigiinnermut tapersersuivallaartutut aamma nunasisunut politikkertik pillugu ulluni kingullerni isornartorsiorneqaqattaarput, taamaattorli parteertik tassaanerarlugu Tuluit Nunaanni naalakkersuinikkut ineriartortitsinissami periarfissaq nutaaq.
