Griikerit aningaasarsiornikkut ilungersunartorsioqaat
Grækenlandimi naalagaaffiup akiliisinnaajunaarnissaa, nunanut Euromik atuisunut kingunerlorujussuarsinnaammat ernummatigineqarpoq, tammannalu pivoq Grækenlandip atukkerneqarsinnaanera appasinnerpaamut inissinneqareersorlu.
Taamalillunimi Grækenland pissutsit nalinginnaasut najoqqutaralugit aningaasanik atorniarsinnaajunnaarmat.
Aningaasarsiornikkut ajornartorsiorneq aamma Grækenlandip avataani malunniuteqarpoq. Ukiup ataatsip ingerlanerani euro Amerikamiut dollariannut naleqqiullugu aatsaat taamak nalikillitigaaq. Aamma nunani tamalaani pappilissanik nalilinnik tuniniaaneq appariarujussuarpoq - tuniniaaffiit taamatut appariarfiusut ilaatigut tassaallutik Hongkong, København aamma New York.
- Nunat euromik atuiffiusut tatiginassusaat ernumanartorsiorpoq, Nunat siuarsagassat taarsigassarsiniartarfianni pisortaq, Dominique Strauss-Kahn, Griikerit aningaasarsiornikkut ajornartornerat pillugu Berlinimi ataatsimeereerlutik oqarpoq.
Ataatsimiinnerup kingorna Tysklandimi politikerit nuimasut arlallit oqaatigaat ikiorsiissutissat ukiuni pingasuni tunniunneqartussat 900 milliardit koruuninik amerlassuseqariaannaasut.
