Maarmorilik piorsaavigineqarpoq
Kalaallit sisamat Schwezimiunut arfineq-marlunnut, Maarmorilimmi majuartaatip annerusup ikkussornissaani qaarusuup paava neruttorniarlugu qaartiterillutik aallartittunut ullumikkut ikiuupput.
- Maanna qaartiterinissarput majuaqattaarnissarpullu aallartipparput, suliamilu isumannaatsuunissap ingerlannissaa pingaartilluinnarlugu, schweizimiut aqutsisuat Nils Trauffer Gasser Felstechnikimeersoq oqarpoq. Taakkua qaarusuup isaariaa portutsinniarlugu suliassaraat – isaariaa portusisaq 300 meterinik itissuseqassaaq, 20 meterillu siulliit qaartiterneqareersimallutik.
- Erniinnaq umiarsuaqarnissaa neriuutigaarput, tassami maskiinanik ikiorteqalerniassagatta, EMJ-ip pisortaa Bo Eriksen Black Angel Miningimik sullissisoq oqarpoq.
- Maannakkorpiaq suliaq kalaallit nukittussusersuannit ingerlapparput, taamalu oqarami pivai kalaallit sisamat maannakkut ujaqqanik qaartitikkanik assaannatik atorlugit sulisut. Taakkua ujaqqat unnuakkut eqqartarpaat, schweizimiullu ulluunnerani qaartiterisarlutik.
Majuartaat aggustip qaammataani atulertussaassaaq, maannalu suliaq piareersaanermik suliaalluni, taamaalilluni Blach Angel Miningip Inngili Qernertumi ingerlatsilernissaa novembarip qaammataata naalernerani aallartissasoq isumaqartoqarluni.
