Tikaagulliusaap neqaa Greenpeace-ikkut arsaarinnissutigeqquaat
Greenpeace-imiit nalunaarutigineqartut naapertorlugit tikaagulliusaat 13-it neqaat umiarsuarmi "NYK Orion"-imi containerini arfineq-marlunniipput, uumasunillu illersuiniaqatigiit Hollandimi oqartussaasunut kaammattuipput, containerit arsaarinnissutigeqqullugit.
- Containerit tikaagulliusaap neqaanik imallit Hollandimi oqartussaasut ingerlaannaq arsaarinnissutigisariaqarpaat, nunanut allanut arfanniartartunuunngitsoq, arfernilli illersuisunut, taamaalillutik takutitsilluassagaluarput, Greenpeace-imeersoq Martin Normann oqarpoq.
Tikaagulliusaaq meterinik 27-nik takissuseqalersinnaavoq 70 tonsinillu oqimaassuseqalersinnaalluni, tassa arferni anginerpaanut tulliulluni.
Nutaarsiassaqartitsivimmi Ritzauimi allaaserineqartut malillugit, Atlantikup Avannaani tikaagulliusaat 50.000-init ikinnerulersimapput, nungutaanissaat aarleqqutigineqarluni, taamaammat nioqqutiginissaat inerteqqutaavoq.
Arferni annersaavoq tunnulissuaq, tamakku 33 meterinik angissuseqalersarput 190 tonsit tikillugit oqimaassuseqalersarlutik.