Kujataani niuertut ikilisarneqarput
Kujataani nunaqarfinni niuertut apriilip aallaqqaataaniit ikilisinnissaat, KNI Pilersuisumit pilersaarutigineqarpoq, nunaqarfiit inuerukkiartornerat aalajangiinermut peqqutaatinneqarpoq.
Skrevet af Judith Hard Peilmann
Niuertunik ikilisaanissaq ukiup affaata matuma siorna pilersaarusiorneqalerpoq, siunissamilu pingasuinnanngortinneqarnissaat siunniunneqarluni.
Qaqortup eqqaani nunaqarfiit Eqalugaarsuit, Saarloq Qassimiullu ataasiinnarmik niuertoqalissapput. Taamatuttaaq savaateqarfik Qallimiut nunaqarfillu Ammassivik Alluitsup Paani niuertumit akisussaaffigineqalissallutik. Kiisalu Aappilattumi niuertup nunaqarfiit Tasiusaq, Narsaq Kujallerlu akisussaaffigilissavai.
Nunaqarfiit niuertoqanngitsut ”niuertorisaat” immikkoortoqarfimmi pisortatut taaneqartalissapput.
Narsarsuaq, Igaliku Qassiarsullu novemberimili ataatsimuulersinneqarsimapput.