Tuluk 112-inik ukiulik nunarsuarmi angutini utoqqaanerpaanngortoq

Tuluit Nunaanneersoq Bob Weighton ullumi sisamanngornermi 112-inik ukioqalerpoq, nunarsuarmilu angutini utoqqaanerpaatut imminut taasinngorluni.

Guinness World Recordip tamanna uppernarsarpaa.

Nunarsuarmi angutini utoqqaanerpaanngortoq 1908-imi inunngorpoq. Taamaattumik sorsunnersuaq siulleq sorsunnersuarlu kingulleq nalaassimallugit. 1937-mi katippoq, kingornalu pingasunik qitornartaarluni. Bob Weighton qulinik ernutaqarlunilu 25-nik ernutaqqiuteqarpoq.

Tuluit Nunaanni inunnut allanut qanillattunnginnissamut sukannersumik maleruagassaqarnera pissutigalugu inuuissiortoq uppernarsaammik allagartamik suli pissarsinngilaq, angerlarsimaffimminili ungasiaaniit nuannersumik nalunaarfigineqarpoq.

AAMMA ATUARUK Nunarsuarmi angutini suli inuusuni utoqqaanersaq inuunertunissamut siunnersuuteqartoq

Japanimiu Chitetsu Watanabe 112-inik ukioqartoq nunarsuarmi angutini utoqqaanerpaasimagaluartoq, februaarip ulluisa 23-anni toquvoq.

Frankrigimiu arnaq Jeanne Louise Calment nunarsuarmi arnani utoqqaanerpaasimavoq. Taanna 1875-imi februaarip ulluisa 21-anni inunngortoq, 122-nik ullunillu 164-inik ukioqarluni Frankrigip kujasissortaani illoqarfimmi Arlesimi 1997-imi aggustip ulluisa sisamaanni toquvoq.