Venstrep Issittoq pillugu oqaaseqartartua Kristian Jensen oqaaseqartartuujunnaarsitaasoq

Danmarkimi aningaasarsiornerup piorsarneqarnissaa pillugu Venstrep, Socialdemokratit, De Radikale De Konservativellu isumaqatigiissusiorfigisariaqarai, Kristian Jensenip aviisimit Jyllands-Postenimit apersorneqarluni siunnersuutigereeraalu Issittoq pillugu oqaaseqartartuujunnarsitaavoq.

Partiimilu aqutsisut oqaloqatigeqqaarnagit taama siunnersuuteqarnini, taassuma Jyllands-Postenimut nassuerutigaa.

Tamannalu maanna kinguneqartitsivoq. Venstrep politikkikkut oqaaseqartartua Sophie Løhde nutaarsiassaqartitsivimmut Ritzauimut taama oqarpoq.

- Partiip iluani malittarisassaqarpugut malitassanik. Taakkulu malinneqarsimanngillat, Sophie Løhde oqarpoq, partiillu siulittaasuata tullersortigisimasaa partii sinnerlugu oqaaseqarsimanngitsoq erseqqissaatigalugu.

Kristian Jensenip Issittoq pillugu partii Venstre sinnerlugu oqaaseqartartuujunnaarsinneqarnermi saniatigut ataatsimiititaliani ilaasortaaffimminit tamani aamma ilaasortaajunnaarsinneqarpoq.

Issittoq pillugu aallartitanut, aningaasaqarnermut ataatsimiititaliami, Savalimmiut pillugit ataatsimiititaliami, Kalaallit Nunaat pillugu ataatsimiititaliami Nunanullu allanut tunngasunut ataatsimiititaliami maannamut ilaasortaagaluarpoq.

Issittoq pillugu oqaaseqartartuunermini Kristian Jensenip nittartakkakkut nutaarsiassaqartitsivikkut Ræsonikkut ukiortaami ilaatigut oqaatigaa Kalaallit Nunaat Danmarkip nunanut allanut tunngasunut politikkiani salliutinneqarnerulersorq, Issittorlu pillugu pissaaneqarniunnermi Danmark nukittunerusutut inissittariaqartoq oqaatigalugu.