Katersuiniarnermi SMS-kkut tunniussisoqarsinnaanngilaq
Kisiannili TV-kkut aallakaatitsinissarsuaq KNR-imi toqqaannartumik aallakaatinneqartussaagaluartoq maanna nalornissutigineqalerpoq nunatsinni isiginnaartartut danskit isiginnaartartut assigalugit siusinnerusukkut nalunaarutigineqaraluartutut SMS-ikkut 1212-imut aningaasanik ikiorsiisinnaassanersut. Aaqqissuisummi politimestereqarfimmit pinngitsooratik akuersissuteqarfigineqarnissartik puigorsimavaat.
- Teknikkikkut periarfissaaapput. Tamatigulli akuersissummik peqqaartarpugut soorlu massakkut Røde Korsimut katersuiniarnermi taama pisoqartoq.
Telemi tusagassiisarnermut pisortaq Malînánguak' Markussen Mølgaard taama oqarpoq.
Danmarkimi Afrikamiunut Haitimilu nunap sajunneranit eqqugaasunut 2010-mi katersuiniarneq arfininngorpat annertunerpaassaaq DR1-imi tv-kkut aallakaatitsinerujussuarmik KNR-illu siuartinnagu toqqaannartumik aallakaatitassaanik ilaqartillugu.
Aallakaatitsinerup nalaani danskit isiginnaartut SMS-ikkut sullissivik 1212 aqqutigalugu ikiuutissatik tunniussinnaavaat. Naallu Tele Greenlandip tamanna isumassarsiatsialattut isumaqarfigigaluarlugu aammalu kiffartuussivimmut aningaasaleeqataajumagaluarluni taava Kalaallit Nunaanni isiginnaartartut taamatut periarfissinneqarnissaat qulakkeerneqarsimanngilaq.
- Massakkut katersuiniarneq uagut akisussaaffiginngilarput, inatsisit malillugu imaakkami, katersuiniartut taakkuupput akuersissummik piniartussat. Uagut taamaaliorutta inatsisinik unioqqutitsisussaavugut. Maliinannguaq Markussen Mølgaard oqarpoq.
KNR-imit nassuerutigineqarpoq tamatumani ajornartorsiuteqartoqartoq.
- Kisiannili uagut politimestereqarfimmit akuersissutip pissarsiarinissaa akisussaaffiginngilarput. KNR-ip taamaallaat TV-kkut aallakaatitsineq aallakaatinniarpaa DR aamma eqqugaasut ikiorniarlugit, aammalu sutigut tamatigut periarfissaqarpoq telefoni aqqutigalugu aningaasanik tunniussaqarnissamut, aallakaatitsinermut pisortaq Aqqa Lynge oqarpoq.
DR-illi maanna nassuerutigaa tamanna ajornartorsiutaasoq, Danmarkimilu katersuiniarnermut pisortap Carl Otto Dethlefsenip maanna politimestereqarfik attaveqarfigalugu.
Kalaallit isiginnaartartut SMS atorlugu tunniussisinnaanerat qulakkeersinnaaneraa Jens Thorinimit aperineqarami Carl Otto Dethlefsen akivoq:
- Qulakkeerinninnissara ajornakusoorpoq, qulakkeersinnaavarali ullut tulliuttut marluk uninngaannassannginnama.
- Haitimut Afrikamullu katersuiniarneq pitsaasumik siunertaqarpoq qularutissaanngilarlu oqartussaasut tamanna aamma nalunngikkaat, taavalu soorunami ikiorumassalluta, qularutiginngilluinnarparali tamanna arfininngorpat aaqqinneqarsimassasoq.
Danmarkimi katersuiniarnermut DR-imi aaqqissuisoq Carl Otto Dethlefsen oqarpoq.
