Internetsertilluni browseri sorleq atortarnerlugu eqqumaffigisariaqarpoq
Nunarsuatsinni internetsimut attaveqartartut amerlasoorujussuupput, ajoraluartumilli taamaattoqarnera aamma atornerlunneqarsinnaavoq.
Qarasaasialeriffissuarmi Google eqqugaasunut ilaatigut ilaavoq, kinamiummi qarasaasialerillammaat, tassa Hackerinik taagorneqartut, Google-mut isersinnaasimapput kikkullu tamaviisa e-mailerutaat, tassa qarasaasiakkut allagaat, atuarsinnaanngorsimallugit.
Paasineqarsimavorlu Microsoftip Browseria Internet Explorer aqqutigalugu Google-mut isaasoqarsinnaasimasoq, tamatumalu kinguneraa tyskit franskillu oqartussaasuisa Internet Explorerip atornissaa mianersoqqussutigilermassuk.
Tassa Danmarkimi, taannalu aqqutigalugu uagut aamma mianersortariaqalerpugut, Danmarkimi IT-lerillammak Zerzad Ahmed taama oqaaseqarpoq:
Internet Explorer version 6 atoraanni taava ilassutaasut - tassa linkit - ilaat iserfigineqartoorsinnaavoq, taannalu ammaraanni paasissutissat, soorlu kreditkortinut kodet, e-mailimut kodet, ilami paasissutissat suulluunniit tassaniittut kikkunnit tamanit takuneqarsinnaanngussallutik.
Internet Explorer version 6-imik atuisut tamarmik browserimik nutarterneqarnissaat Zerzad Ahmed-ip kaammattuutigaa, imaluunniit internet explorerip unammillertaanut, soorlu Opra, Safari imaluunniit Firefoximut nuunnissaat aamma kaammattuutigalugu.
