Akerliussutsimik takutitsiniartut sms-eqqusaajunnaarput
- Kikkut tamarmik sms-imik e-mailimillu atuisut ilisimasariaqaraluarpaat, taakkununnga allatatik misissorneqarsinnaammata kimillu nassiussaaneri paasineqarsinnaammata, politiit qullersaat oqarpoq.
Præsidentimut juunimi qinersinerup kingornagut, Iranimi palasiunerit naalakkersuinerannut arlaleriarluni akerliussutsimik takutitsisoqartarpoq. Tassami illuatungiliuttut isumaqarmata, præsidentimut qinersisoqarmat, præsident Mahmoud Ahmadinejad qinersinermi ajugaanngitsoq, qinersinermulli ataatsimiititaliamit, palasiunernit naalakkersuisunit nakkutigineqartumit ajugaatinneqartoq.
Iranimi naalakkersuisunut akerliussutsimik takutitsiniarluni kajumissaarinerit, annerusumik sms-ikkut emailikkullu nassiussuunneqartarput. Tamatuma saniatigut akerliussutsimik takutitsisut, nakuuserfigineqaraangata, tamakku nunarsuarmioqatinut sms-ikkut emailikkullu oqaluttuarineqartarput.
Iranimi naalakkersuisut atortorissaarutinik immikkut ittunik, oqarasuaatinik angallattakkanik tusarnaarnermut aamma qarasaasiat programiinut isissutissatut atorneqarsinnaasunik pisisimapput.