Aligoqqimmik nassaartoqarnera NunaMineralsimit isumalluarfigineqarpoq
Nuup Kujataata kangiani 100 kilometerinik ungasitsigisumi, Tikiusaami aligoqqinnik, tassa diamantinik nassaartoqareernerisa kingunerisaanik isumalluartoqarpoq.
Skrevet af Elisa Isaksen
11. januar 2010 12:38
Aatsitassarsioqatigiiffiup misissuiffissatut akuersissuteqarfigisaa alla, Qaamasoq, Nuup avannaata-kangiani 130 kilometerinik ungasissusilimmiittoq, misissuinikkut paasineqarpoq, qaqqat sananeqaataat tamaaniittut aligoqqeeqarnissaannik ilimanaateqarluinnartut.
- Misissuinerit siulliit uppernarsarpaat, nunap immikkoortui pineqartut, akilersinnaasumik aligoqqimmik piiaaffiusinnaanerat ilimanaateqartoq, NunaMineralsip pisortaa Ole Christiansen tusagassiuutinut nalunaarummini taama allappoq.
Aatsitassarsiortitseqatigiiffiup misissuinini ingerlateqqinniarpai, ilaatigut qulimiguulimmit saviup kajungerisaa atorlugu uuttortaanertigut. Tamatumunnga peqatigitillugu NunaMinerals misissueqqissaarnermini suleqatissarsiortoq oqaatigineqarpoq.
