Nunap immikkoortuini peqqissaaviit marluk pilersinneqalersut
Nunap immikkoortuini peqqissaavinnik misiligutigalugu pilersitsineq, peqqinnissamik ingerlatsinerup tamarmiusup aaqqissuussaaneranik aaqqissuusseqqinnermi, iliuuserineqartoq siulliuvoq, illoqarfinnilu peqqissaaviit 16-iusut nunap immikkoortuini peqqissaavinnik tallimanik pilersitsinikkut allanngortinniarneqarlutik.
Nunap immikkoortuini peqqissaavinnik pilersitsinerup saniatigut aaqqissuusseqqinnermi aamma ungasianit nakorsiartitsineq atorlugu nakorsiartitsisarnermik atuinerulernermik sulisunillu aalajangersimasumik atorfilinnik ilinniartitsinermik tunngaveqarpoq, sulisut ilinniartitaanerup kingorna nutaanik suliassaqalersinnaassallutik:
- Peqqinnissamik ingerlatsivik sulisussaminik pilerinarnerulersitsisinnaanermut sulisullu pigiinnarsinnaanerannut tunngatillugu unammilligassaqartorujussuuvoq. Aaqqissuusseqqinnikkut immikkoortortanik annerusunik pilersitsissaagut peqqissaanermik sulialinnik sulisussarsiornissamik ajornarunnaarsitsiviusussamik, Peqqissutsimut Naalakkersuisoqarfik allappoq.
Nunap immikkoortuini immikkoortortaqarfiit misiligutaasut 2011-mi januaarip aallaqqaataata tungaanut ingerlassapput, immikkoortortallu marluk taakku taaneqarallassapput: Nunap Immikkoortua Disko aamma Nunap Immikkoortua Qeqqa.
Aasiaat, Kangaatsiaq, Qeqertarsuaq aamma Qasigiannguit Nunap Immikkoortuani Diskomiissapput, Nunallu Immikkoortuani Qeqqaniillutik maanna najukkani peqqinnissaqarfiit Sisimiut aamma Maniitsoq.