Nuummi inissarsiorlutik utaqqisut amerlapput
Kommunini innuttaasut 20.954-iupput, taakkunanngalu 4.152-it A/S INI-mut imaluunniit Iserit A/S-imut inissarsiorlutik utaqqisuniipput. Kommuneqarfik Sermersuup aviisiani "Tusaat Sermersuumi" tamanna allaaserineqarpoq.
Namminersorlutik Oqartussat inissiaataannut A/S INI aqqutigalugu Nuummi inissarsiorsimagaanni ukiut 29-t utaqqisoqarsinnaasarpoq, matumani qanoq angitigisumik inissarsiorneq apeqqutaasarluni.
Inissiaatileqatigiiffiup, kommunimit tamakkiisumik pigineqartup, Iserit A/S-ip, utaqqisunut allassimaffiutaa naapertorlugu, kommunimi tamarmi utaqqineq aamma sivisusinnaavoq, inissamik qanoq ittumik, qanorlu angitigisumik, qinnuteqarsimaneq apeqqutaalluni. Marlunniit tallimat tikillugit initalimmik piniarluni Iserit A/S-imut allatsissimagaanni ukiuni aqqaneq-marlunniit 18-inut massakkut utaqqisoqarsinnaasarpoq.
Kommuneqarfik Sermersuumi illoqarfiit katillugit tallimaapput, nunaqarfiit arfineq-pingasuullutik, Nuummilu inissarsiorlutik utaqqisut amerlanerpaapput.
