Meeqqat aqqusinikkut ikaarniartarnerat isumannaannerulissaaq
Taamaattumik meeqqat isumannaatsumik aqqusinikkut atuariartortarnissaat anguniarlugu skolepatruljenik tassa atuarfiit eqqaanni aqqusinerni qaqortunik nalunaaqutserneqarsimasuni nakkutilliisussanik pilersitsisoqartussanngorpoq.
- Atuarfiup eqqaani aqqusinikkut ikaarfissat marluupput maannalu ukiariartorluni sila taartalerpoq atuartullu ilaat biilinik aggertoqarnersoq ilaatigut qineqqaaratik ikaariasaarsinnaasarput meeqqallu isumannaatsumik aqqusinikkut ikaarsinnaasarnissaat suliniuteqarnitsinni siunertarigatsigu aqquserngit ikaarfissiat ullaakkut nakkutilliisoqartalissapput, Kangillinnguit Atuarfianni ilinniartitsisoq suliniummullu akisussaasoq, Allan Kirkegaard oqarpoq. Kangillinnguit eqqaanniittut aqquserngit ikaarfissiat ullaakkut nalunaaqutaq arfineq-pingasunut tanneq qulingiluanit arfineq-pingasut tungaanut 8. klassimi atuartut nakkutilliisussatut pikkorissarneqarsimasut sisamat, meeqqat atuariartukaanerisa inuillu suliartukaaffiisa nalaanni nakkutilliisalissapput.- Annerusumik ajutoortoqarsimanngikkaluartoq taamaattoq meeqqat ilaat ullaakkut atuariartortillutik aqqusinikkut biilinik allanik aggertoqarnersoq qineqqaaratik ikaarniartarnerat ulorianartorsiorfiusartoq isilittagaqarfigaarput, taamaattumik uloriarnartorsiornerit pinaveersaartinniarlugit nakkutilliisartussanik pilersitsilerpugut, Allan Kirkegaard nassiuaavoq. Kalaallit Nunaanni siornatigut atuarfiit eqqaanni aqqusinerni nakkutilliisoqartitsisoqartarsimagaluartoq, maanna Kangillinnguit Atuarfiat Nuummi kisiartaagallarluni nakkutilliisunik pilersitsisussanngorpoq.
Taamatut aaqqissuussinerup atuarfinni allani aamma atuutilernissaa neriuutiginartinneqarpoq. - Neriuppunga atuarfeqarfiit allat skolepatruljenik pilersitsillutik suliniuteqalernissamut kajumilerumaartut aammami Kangillinnguit Atuarfiat angallannikkut kisimi ajornartorsiuteqanngilaq aamma neriuppunga biilertartut paasinnillutillu tapersersuiumaartut, Kangillinnguit Atuarfianni ilinniartitsisoq suliniummullu akisussaasoq, Allan Kirkegaard oqarpoq. Kangillinnguit Atuarfianni meeqqat atuartut katillugit 550-it missaanniipput.
