Aviisit pappiaqqallu illunut oqorsaatissiarineqarsinnaapput

Oqorsaatissiatut soorlu rockwoolituulli pappiaqqanik oqorsaatissiat atorluarsinnaatigipput, Ole Villumsen oqarpoq.

Pappiaqqat atoqqillugit oqorsaatissialiarinerat iluaqutissarpassuaqartoq Ole Villumsenip oqatigaa.

- Isugutammik iioraasinnaallunilu aniatitsisinnaagami iluaqutitaqaqaaq. Angallanneqarnera inikittunnguullunilu sumiiffinni suliarineqarinnaavoq, Ole Villumsen oqarpoq.

- Pappiaqqanik oqorsaatissiaq illumut supooruserluni ikkussuunneqartarpoq taamaalillunilu oqorsaatissianut nalinginnaasunut sanilliulluni ussinnerulluni.

Supooruserluni ikkussuunneqaraangami illup qisuttaanut, ilusilersorneranut, innaallagissap aqqutaannut kiisalu ruujorit aqqutaannut attuutivittarpoq. Taamaaliornikkut ussissuseq qaffasinnerusoq anguneqartarluni, Ole Villumsen nassuiaavoq.

Avatangiiseq eqqarsaatigalugu pappiaqqanik oqorsaasiorneq aamma iluaqutaavoq.

- Pappiaqqanik oqorsaatissiat ikuallajajunnaarsillugit oqussinnaajunnaarsillugillu sanaartorneqartarput. Akuutissallu atorneqartut navianartuunngillat - kigutit qaqorsaataanni isinullu kuseriaatini atorneqartartut assigerluinnarpaat, Ole Villumsen nassuiaavoq.

Periuseq ukiuni 30-ni pitsaasumik angusaqarfiusumik Canadami atorneqareerpoq. Illussanik titartaasartoq Bill Sempler, Canadami tamarmi illuni nutaanngitsuni nutaanilu pappiaqqat oqorsaatissiat atorneqartarneranni immikkut ilisimasaqartuuvoq. Pappiaqqanik oqorsaatissiat pitsaasuusut taassuma Ole Villumsen isumaqatigaa.