UNICEF Namminersortunit suleqatigineqalerpoq
Naalakkersuisut meeqqanullu suliniaqatigiiffiup, Naalagaaffiit Peqatigiit ataaniittup, UNICEF-ip, suleqatigiissinnaalernissaat anguniarneqalerpoq, aallartitat Nunatsinnut tikeraareersullu. Namminersorlutik Oqartussat paasissutissiisarfiannit tusagassiuutinut nalunaarummi allassimasoq naapertorlugu meeqqanut suliniutit qaammatini aggersuni piviusunngussagunarput.
10. oktober 2009 13:39
Kalaallit Nunaata, UNICEF-ip Nunatsinnilu meeqqanik ikiuiniaqatigiiffiit, nammineq piumassutsiminnik sulisut allallu suleqatigiinnerisigut suliniutit ineriartortinneqassapput.
UNICEF-imi pisortaq, Philip O'Brian, Nuummi tikeraarnerminut atatillugu oqarpoq, Kalaallit Nunaanni meeqqat ilaat ajornartorsiuteqarlutik peroriartortarnerat ersarissoq, tamannalu inuunerissaarnissaannut akornutaasinnaasoq. Kalaallit Nunaatali tamanna iliuuseqarfigerusukkaa aamma erseqqinnerarpaa.
- UNICEF-ip, Namminersorlutik Oqartussat Kalaallit Nunaannilu meeqqat pillugit sullissisut aappaagumiit suleqatigiilernissaasa meeqqat inuunermi atugaannut, pingaartumillu meeqqanut navianartorsiortunut, qitiusumik iluaqutaanissaat ilimagaarput, Philip O'Brian oqarpoq.
