Nunat Avannarliit nunanut ineriartortunut aningaasaliipput
Tassa siulersuisut sapaatip akunenrani matumani taama aalajangiipput.
Aningaasaliissutit ilaatigut Ugandami aamma Rwandami seqernup nukinganik nukissiuutinut atorneqassapput. Taamatut suliniuteqarnermut aningaasaliinermi suleqatigineqarlutik Verdensbanken, Den Asiatiske Udviklingsbank, Finlandimiut nunanut allanut ministereqarfiat aamma Nunani Avannarlerni avatangiisinut aningaasaateqarfik NEFCO.
- Nunarsuatsinni nunani piitsuunerpaani silap pissusaanut atatillugu suliniummik aallartitsisinnaagatta nuannaarutigeqaarput. Nunanimi tamakkunani silap pissusaata allanngoriartornera imaannaanngitsunik unammilligassanik nassataqarmat. Nunat Avannarliit Ineriartortitsinermut Aningaasaateqarfiata misilittagaqarnermigut aningaasaliisartunillu allanik suleqateqareernermigut nunat ineriartortut silap pissusaanut atatillugu tapersersorsinnaavai, aningaasaateqarfiup pisortaa Helge Semb oqarpoq.
Aningaasaateqarfik ukiuni 20-ni nunanut ineriartortunut iluaqutaasumik aningaasatigut atukkiisareerpoq.
