Puussiat pinngortitamut akornutaanngitsut nioqqutigaat

Jyllandip kujataani suliffeqarfik International Bag Industry, Ibi-mik naalisarneqartartoq, puussianik plastikkiusunik nutaaliaasunik tunisassiortuuvoq. Puussiallu pinngortitamut iginneqarsimatillutik ukiup aappaata affaa qaanngiukkaangat nunguttarput iminngorlutik, issunngorlutik CO2-nngorlutillu.

Suliffeqarfiup puussiat ukioq ataasingajak tunisassiarereerpai maannamuugallartorlu pisisartut ikittuinnaapput, tamakku ilagaat danskit suliffeqarfiutaat, svenskit katersugaasivii amerlanngitsut suliffeqarfiillu arlaqartut kiisalu nunatsinni pisortat suliffeqarfiutaat. Tamakku ilagaat Kommuneqarfik Sermersooq Nuummilu nujalerisarfik Lulu, Ibi-mi pisortaq Johnny Nielsen ilisimatitsivoq.

Puussianut allanut sanilliullugu puussiat 10-20 %-it missaannik akisunerulaarput, paarlattuanik pitsaassuseq taannarpiaalluni, suliffeqarfiullu maannakkut sulissutigaa puussianut qalipaatit arrortinneqarsinnaasut inerisarnerat, pisortaq ilisimatsivoq.

Puussiat pinngortitamut eqqarneqaannartarnissaannik tamanna kinguneqassanngitsoq, taamaattoqassappalli puussiat suujunnaarumaartut erseqqissaatigaa.