Qinersiviit pingajorarterutaat kisinneqareersut Karzai siuarsimanerulerpoq
Afghanistanimi præsidentimut qinersinermit ullut qulingiluat qaangiuttullu, qinersinermik nakkutilliisut qinersiviit pingajorarterutaanni qinersinernik kisitsereersimalerput.
Skrevet af Elisa Isaksen
29. august 2009 13:24
Qinersinerit taakku kisinneqareerneranni præsident Hamid Karzai-p qinigaanermigut siuaqqanera annerulersoq, qinersinermi ataatsimiititaliamit ullumikkut oqaatigineqarpoq.
Kisinneqareersut najoqqutaralugit Karzai 46,3 procentinit qinerneqarpoq, unammillertaalu Abdullah Abdullah 31,43 procentinit qinerneqarluni.
Præsidentimut qinigassanngortittut arlaannaalluunnit 50 procentit sinnerlugit qinerneqanngippat, qinigassanngortittuni qinigaanerpaat marluk akornanni aappassaanik aalajangiiffiusumillu qinersisoqassaaq.
