Irakimiit qimaasut uternissaat isumaqatigiissutaasimanngilaq
Oqaluffik Brorson Kirke Københavnimiittoq, irakimiut 17-it Danmarkimut nunasinissamik qinnuteqarsimagaluartut, Irakimut utertitaannginnissartik anguniarlugu maajimili najugaqarfigisaat, politiinit unnuaq isaaffigineqareersorlu, Irakimi ministeriuneq, Nuri al-Maliki, aalajangersimasumik oqarpoq, irakimiunik qimarngusunik angerlartitaasariaqartunik nunasisoqarnissaanik nunat allat Irakip isumaqatigiissuteqarfigisimanngisaannarai.
Irakip ministeriunerata taama oqarnera naalakkersuisut nittartagaanni, tamanit takuneqarsinnaasumi, atuarneqarsinnaavoq.
Tamanna Irakimiit nunasiniat nunagisaannut pinngitsaalillugit utertinneqarsinnaanerinik isumaqatigiissuteqarsimanermut, Danmarkimi naalakkersuisut isumaat naapertorlugu, naapertuutinngilaq.
- Taama isumaqatigiissuteqarnikuunngilagut. Oqareerpugut irakimiu pinngitsaalisaalluni angerlartinneqarniartoq ataasinnguarluunniit akuerinaviarnagu, Irakimi ministeriuneq oqarpoq. Taanna isumaqarpoq, irakimiut qimarngusut, meeqqatik ilagalugit nunat arlaanniittut, angerlartinneqaraluarunik tarnimikkut ajoquserneqassasut.