Tysklandimi peqqinnissamut ministeri ilungersunartorsiorpoq
Tysklandimit peqqinnissamut ministerip socialdemokratineersup Ulla Schmidtip, qineqqusaarnissap aallartinnginnerani sap. akunnerini marlunni qasuersaalaarnissani naatsorsuutigisimagaluarpaa, tamannali pisinnaajunnaarluni Spaniamiu biilimik tillimmat. Ministeri Spaniami Alicantemi feeriarpoq ministeritullu biileqarluni limousinemik ingerlatitsisua ilanngullugu. Tillinniaq hotelimi ministerip inaanut isersimavoq, matuersaatit tillillugit limousinemillu aqerlunit pitarneqarsinnaanngitsumik aallarussilluni.
Nutaarsiassaq Tysklandimi tutsiummat limousinep ilumut Spaniamiinnera inuit tupigusuutigaat. Ministeri timmisartorluni Spanialiarsimavoq, biilinilli ingerlatsisoq Alicantemut kilometerit 3.000-ngajattut ungasitsigisumut biilersimalluni. Ministereqarfik nassuiaavoq Ulla Schmidtip illoqarfimmi tassani tyskinik nunami allamiunngorsimasunik ataatsimeeqateqarnissaminut feeriami ilaa atorniarsimagaa. Maannali tassa peqqinnissamut ministerimut isornartorsiutit imaaginnalivipput.
Akileraartartut akiligaannik atornerluiniarsimasutut unnerluutigineqarpoq. Regnar Holzip akileraartartut peqatigiiffiata siulittaasua oqaloqatigaa.
-Fru Schmidtip biilimik allamik atuisinnaanerluni attartorsinnaanerluniluunniit aallartitaqarfik aperisimasariaqaraluarpaa, tamannami akileraartartunut akikinnerujussuussagaluarpoq. Taamaattoqarnera pillugu ministeri soqutigisaqaqatigiinnit politikerinillu isornartorsiorneqalerpoq, pisorlu taamaalilluni Tysklandimi septemberimi qinersisoqarnissaani maanaannakkut aallartinnerulluni.
