Sodavandiliaq immummik sanaaq USA-mi tunisaalerpoq
Imeruersaat Vio-mik taagugaq USA-mi niuertarfissuit ilaanni misilillugu tuniniarneqaleruttorpoq, immummillu imeruersaasiaq taanna paarnat isserannik mamarsaasigaavoq rørsukkunillu tungusunnitsuligaalluni.
Sodavandi immummik sanaaq sisamanik assigiinngitsunngorlugu pisiarineqarsinnaavoq, fersken, paarnat, citrus aamma tropic-itut pisiarineqarsinnaassaaq. Peqqinnarpallaanngilarli, tassami sukkut akui kvart literimut 26 grammiupput.
Taamaakkaluartoq Coca-Cola-p nalunaarutigaa, sodavandiliaq ima mamartigisoq allaat "nannut inuuissiortoornerattut" mamaqarluni.
USA-mi misilillugu tunisaanera iluatsilluassappat nunarsuup sinneranut tunisassiaalissasoq, imeruersaasiorfissuup Coca Cola-p piareersimaffigaa.
Danmarkimi imeruersaatinik tunisassiortup Arla Foods-ip imeruersaat nutaassaaq pissanganartutut nalilerpaa.
- Imeruersaat immummik sanaaq qappiortartoq nutaarluinnaavoq. Takulaariartiguli amerikamiut qanoq soqutigitigineraat, Theis Brøgger Arla Foods-imeersoq oqarpoq.
Arla Foodsip nammineq youghurti imerpalasoq qappiortartoq siornaakkunni tunisassiaraa, pisisartunilli iluarineqanngimmat tunisassiaajunnaarnikuuvoq.