Toqutsisartut nunarsuarmi tamani suliaqartartussaasimagaluarput, taakkulu sakkutuujupput immikkut sungiusakkat Al Qaidami sakkutuunik ujaaseriarlutik qoqassiillutik toquttartussaasimagaluarlugit. CIA-meersut aterminnik taaseqqusinngitsut aviisimut New York Timesimut taama oqaluttuarput.
Toqoraasartut nunani USA-p sorsuffigalugu nalunaaruteqarfiginngisaani allaat suliaqartartussaasimapput, taamaasiornerlu inerteqqutaavoq.
"Eqqarsarnartoqartippara". Sakkutooqarnermik ilisimasalik Kenneth Bull toqoraasartut pillugit taama oqarpoq.
"Maannamut paasisavut tunngavigalugit naalagaaffiit innuttaasa pisussaaffiinik maleruagassaat malinneqarsimanngillat." Kenneth Bull oqarpoq.
CIA-p suliaa iluamilluunniit aallartissimanngilaq, tassungalu peqqutaaqataasoq tassaavoq Amerikamiut sakkutuuisa Kenyami iluatsinngitsumik toqutseriarsimagaluarnerisa ajornartorsiortitsilersimanera, aviisi The Guardian allappoq.
Toqutsisartut suliakkerneqarneranniit ukiut arfineq-marluk qaangiutillartullu Amerikami naalakkersuinermik suliallit tamatuminnga aatsaat oqaluttuunneqarput. Pineqartorlu eqqarsarnartoqartoq sakkutooqarnermik ilisimasalik Kenneth Bull oqarpoq, nangillunilu: "Nunat USA-tut ittut taamaasiornerisigut malittarisassat ataqqineqarunnaariartulissapput."
USA-mi præsidentimut tullersortaasimasoq Dick Cheney naalakkersuinermik sulialinnut isertuusseqqusimasutut pasillerneqarpoq, pisuutitsinerlu tamanna suli oqaaseqarfiginngilaa.