Perorsaasut Ilinniarsimasut Kattuffianni siulittaasoq Kaaliina Skifte isumalluarpoq.
- PIP-minngaanniit oqaatigissavarput assorujussuaq nuannaarutigigatsigu taakkua Naalakkersuisoqarfiit massakkut immikkoortinneqalermata. Akisussaaffiit annertoorujussuupput, soorlu inunnik isumaginnittoqarfik eqqaaginnarlugu annertuvoq, Kaaliina Skifte oqarpoq.
Taamaammat PIP-p Peqqissutsimut ilaqutariinnermullu tunngasut immikkut naalakkersuisoqarfinngulernerat nuannaarutigisorujussuuaa. Taamaalilluni qinersineq sioqqullugu meeqqat atugaat eqqartorneqaqattaarmata suliniutissat pimoorullugit ataavartumillu sulissutigineqarnissaat ilimanarsinerarpaat.
PIP-mit aamma neriuutigineqarpoq naalakkersuinikkut sulinermi akuutinneqarnerulissallutik.
- Sulianut ataasiakkaanut tunngatillugu PIP-p tusarniarneqartarnissaa pingaartittorujussuuaarput. Assersuutigalugu innarluutilinnut aamma meeqqanut inuusuttuaqqanullu tunngasut ilisimasaqarfigisorujussuuagut, taamaammat arlaatigut suliniutinik aallartittoqartillugu kattuffitta peqataatittarnissaa pingaartissavarput. PIP-p tusarniarneqartarnissaa pingaartittorujussuuarput, Kaaliina Skifte oqarpoq.
PIP-p siulittaasua Kaaliina Skifte Naalakkersuisoqarfissat kikkunnit inuttalerneqartussaanerat ippassaq tusarlugu taama oqarpoq.