Canadap inatsisartuini siullerpaamik Inuktitut oqalugiarpoq
Mary Simon Canadami senatimut ullumi Inuktitut oqaluppoq pissutigalugu siorna naggueqatigiit Inuit atuarfinni nerisaqarfiutigisuni pineqarnerannut Canadap naalakkersuisuisa naalakkersuisutigoortumik utoqqatsissuteqarneranniit ukioq ataasinngorlugu nalliuttorsiortoqarmat.
Oqaaseqarpoq taamatut utoqqatsissuteqarnerup takutikkaa naalakkersuisut naggueqatigiinnut Inunnut isumaat allanngorsimasoq tamannalu nutaanik marlunnik periarfissaqalersitsisoq. Kisiannili, Mary Simon aamma oqarpoq, naalakkersuisut ilumut ilumoorussinerannut maanna iliuuseqartoqartariaqalerpoq.
Canadap naalakkersuisuinut iliuutsit taakkua ilaat tassaajumaarpoq naalagaaffiit peqatigiit nunat inoqqaavisa pisinnaatitaaffii pillugit nalunaarutaata atsiorneqarnissaa. Iliuusissap aappaa pingaaruteqarluinnartorlu tassaavoq naggueqatigiit Inuit ilinniartitaanneranni Inuktitut oqaatsit atornissaasa tapersersorneqarnissaat. Pisortatigoortumik Canadamiut guvernøriat generaliallu sap. akunnerani kingullermi puisip neqaanik ooqanngitsortorsimanerannut taamalu naggueqatigiinnut Inunnut taakkualu kulturiannut tapersersuinerminnik takutitsinerannut pisortatigoortumik qutsavigai. Mary Simon senatimut oqalugiarpoq ilaatigut Inuktitut, tassami senatip oqaatsit Inuktitut senatimi naalakkersuisutigoortumik atorneqarsinnaanerat aalajangereermagu.